Komodo-draak eis amper man
2010-02-24 04:41
Jakarta – ‘n Indonesiese wildbewaarder het ‘n aanval van ‘n komodo-draak, die wêreld se grootste reptielspesie, vrygespring nadat sy kollegas sy hulpkrete gehoor het en die reptiel weggedryf het.
Marcelinus Subanghadir was Maandagaand buite sy hut op Komodo Eiland toe een van dié drake van oor die twee meter hom aan sy regtervoet gegryp het, het Tamen Sitorus, hoof van die Komodo Nasionale Park, gesê.
Die draak het Subanghadir se voet met sy saagagtige tande, amper soos dié van ‘n haai, vasgeknyp totdat die ander wildbewaarders gehoor het hoe hy skree en die reptiel met houtstompe weggejaag het, het Sitorus gesê.
Die 34-jarige Subanghadir het diep skeurwonde opgedoen en herstel in ‘n hospitaal naby Bali.
Komodo-drake word slegs in die natuur in die oostelike Indonesiese eilande van Komodo, Padar en Rica aangetref.
Hulle word op minder as 4 000 beraam en kan langer as drie meter word en tot 70 kilogram weeg.
‘n Agtjarige seun is in 2007 op Komodo Eiland deur een van dié reptiele doodgebyt.
- Sapa-AP
