Kommer neem toe oor Gasa-geweld
2012-11-16 16:41
Warsaw – Francois Hollande, president van Frankryk, het Vrydag gesê hy is diep bekommerd oor die toename in geweld in die Gasastrook.
Hy het gesê hy het Donderdag met Israelse en Egiptiese leiers oor die situasie in die streek gepraat.
"Ek is diep bekommerd oor wat gebeur in die Gasastrook," het Hollande tydens ‘n gesamentlike mediakonferensie met Bronislaw Komorowski, president van Pole, aan joernaliste gesê.
Komorowski en Hollande het albei 'n beroep op die leiers van Israel en Palestina gedoen om met vredesonderhandelings te begin.
Intussen het die Duitse bondskanselier, Angela Merkel, Vrydag gevra dat Egipte sy invloed op Hamas moet gebruik om die spanning in die Gasastrook te help verlig.
Egipte se premier, Hisham Qandil, is tans op ‘n besoek aan die Gasastrook.
“Die bondskanselier vra dat die Egiptiese regering sy invloed op Hamas gebruik om die geweld in die Gasastrook te verminder,” het Georg Streiter, 'n woordvoerder vir Merkel, by ‘n mediakonferensie gesê.
– Volg Nuus24 op Twitter
- Sapa - AFP
