Kokaïen van R2.4 miljard in Italiaanse hawe gevind
2010-11-16 09:40
Rome – Die Italiaanse polisie het Maandag beslag gelê op kokaïen met ’n straatwaarde van tot €250miljoen (R2.4 miljard) in ’n houer wat van ’n handelskip afgelaai is, het die polisie hier gesê.
Die deursoeking van die skip, wat van Brasilië af gekom het, was deel van ’n gesamentlike operasie met die Britse polisie.
“Dit is die grootste dwelmvonds in Italië die laaste 15 jaar,” het Salvatore Cagnazzo, bevelvoerder van die Carabinieri-paramilitêre polisie wat in beheer van die ondersoek is, gesê.
Die kokaïen, met ’n straatwaarde van tussen €200miljoen en €250miljoen, was versteek in vier trekkers wat in die hawe Gioia Tauro in die suide van Italië afgelaai is.
“Ons het die operasie met behulp van Soca (die Britse agentskap teen ernstige georganiseerde misdaad) uitgevoer,” het Cagnazzo gesê. “Toe ons die trekkers deur skandeerders geplaas het, het ons die dwelms in die metaalpype gevind.”
Ondersoekbeamptes het gesê die dwelmvonds bevestig die ontstaan van ’n nuwe dwelmsmokkelroete deur die suidelike Italiaanse streek Kalabrië, waar Gioia Tauro geleë is, eerder as deur Nederlandse hawens.
“Ons word deur ’n nuwe toestroming in die dwelmmark in die gesig gestaar,” het ’n aanklaer, Giancarlo Capaldo, aan verslaggewers hier gesê.
“Dwelms het voorheen deur Noord-Europa beweeg, deur Nederlandse hawens. In dié geval het dwelmhandelaars ’n hawe in Kalabrië gebruik.”
Gioia Tauro is een van die grootste kommersiële hawens in Europa.Die dwelms was blykbaar vir Brittanje, Nederland en die Lombardye-streek in die noorde van Italië bestem.
Cagnazzo het gesê niemand is in hegtenis geneem nie.
Volg Nuus24 op Twitter
- Die Burger