Koalisiepoging in België misluk weer
2011-11-23 08:02
Den Haag – Altesame 526 dae ná die laaste algemene verkiesing in Junie verlede jaar in België het die soveelste poging om ’n nuwe regeringskoalisie te vorm, misluk. Die man wat premier sou word, Elio di Rupo, het aan koning Albert II verslag gedoen dat hy as “formateur”, soos dit genoem word, bedank.
Vier Nederlandssprekende en vier Franstalige Waalse partye het aan die onderhandelings deelgeneem.
Hulle het reeds ’n paar weke gelede een van die grootste struikelblokke, die groter voorregte wat Franssprekende kiesers in enkele munisipaliteite rondom Brussel geniet, opgelos. Oor dié probleem baklei die Vlaminge en Wale reeds dekades en die ooreenkoms was ’n egte deurbraak.
Baie waarnemers het toe gemeen die res van die onderhandelinge sou maklik wees. Hulle was verkeerd.
Naas die historiese teenstelling tussen Vlaminge en Wale het ’n ander historiese teenstelling nou ’n rol gespeel, dié tussen liberale en sosialiste. Toevallig is dit so dat die Vlaminge (moontlik weens hul welvaart) meer geneig is om die vrye mark te steun, en die Wale (dalk weens hul groter armoede) meer in die rigting van die sosialisme neig.
Die pylvak van die onderhandelinge het oor die komende begroting gegaan. België is een van die Europese lande waar die begrotingstekort en staatskuld te groot is, en sowel die Europese Kommissie as die markte eis ekonomiese hervormings.
Byvoorbeeld: Belge mag al op 52 jaar aftree as hulle wil. Dis onbekostigbaar, en die liberale wil dit verander, maar die sosialiste meen dis ’n onvervreembare reg en wil dit behou.
Uiteindelik het Di Rupo, ’n Waalse sosialis, gesien hy kom nie ’n millimeter verder nie, en handdoek ingegooi.
Die Europese Kommissie het België ingelig dat die begroting vir aanstaande jaar op 15 Desember afgerond moet wees, anders moet die land ’n boete van 700 miljoen euro betaal. Bowendien het die rentekoers op staatslenings tot 3,39% gestyg, waar dit in Oktober verlede jaar nog 1,69% was.
België dreig om heeltemal tot stilstand te knars. As Di Rupo – of iemand anders – die trein nie weer aan die loop kan kry nie, kan dit die begin van die einde vir dié land wees.
– Volg Nuus24 op Twitter.
- Volksblad