Kind sterf toe hangbrug breek
2009-10-27 08:41
Maleisië – ‘n Maleisiese student is dood en twee ander was Dinsdag nog vermis nadat die hangbrug waarop hulle geloop het, gebreek het.
Altesaam 22 leerders het laat Maandag in ‘n rivier geval in die noordelike staat van Perak toe die brug gebreek het.
Die groep van 298 kinders van 60 skole in die staat was op ‘n kamp-uitstappie.
Drie van die kinders was vermis en die polisie het Dinsdagoggend slegs die 11-jarige Dina Feve Nathan se lyk twee kilometer van die ongelukstoneel in die rivier gevind.
Polisie het gesê dat ‘n soektog nog aan die gang is vir die ander twee vermiste kinders.
Die yster-kabel brug is onlangs gebou om ‘n ouer brug te vervang, het die Star aanlynkoerant berig.
Zambry Abdul Kadir, die hoofminister van die staat, het sy medelye aan die familie van die oorledene betuig en het bygevoeg dat hy onmiddellik ‘n ondersoek in die oorsaak van die ongeluk geloods het, het die amptelike Bernama nuusagentskap berig.
“Die hangbrug was nog nuut. Ons wil weet of dit volgens spesifikasies gebou is, aangesien dit geval het nadat ‘n metaal pilaar uit die grond geruk het,” het hy gesê.
Oorlewendes het aan die Star gesê dat sommige van die studente wat oor die brug gestap het op dit begin spring het om die ander studente bang te maak. Die brug het kort daarna gebreek.
- Sapa-dpa