Kenners vervang waarnemers in Sirië

2012-08-17 13:30

Londen – Die Verenigde Nasies het sy waarnemersmissie in Sirië beëindig terwyl gevegte tussen die rebelle en regeringsmagte in Aleppo voortduur, het Sky News berig.

Die 300 ongewapende waarnemers sal met 'n groep weermagraadgewers en politieke, menseregte en burgerlike kenners vervang word.

Die president van die veiligheidsraad, Gerard Araud, het gesê daar is ooreengekom dat die voorwaardes vir die verlenging van die missie nie nagekom is nie en dat dit Sondag tot 'n einde sal kom.

Die voorwaardes was dat die geweld moes afneem en die gebruik van swaar wapens gestop moes word. 

Lede van die waarnemers het sedert 15 Junie meestal in hotelle gebly uit vrees vir die geweld.

Dié besluit kom twee weke nadat Kofi Annan as internasionale bemiddelaar vir Sirië bedank het nadat die implementering van sy sespunt vredesplan misluk het.

Rusland het intussen 'n vergadering vir Vrydag by die Vernigde Nasies in New York gereël om te bespreek hoe die verspreiding van die konflik gestuit kan word.

Intussen het aktiviste gesê Siriese magte het 'n groep mense wat buite 'n bakkery in die Qadi Askar-distrik, in die oostelike deel van Aleppo, gestaan het gebombardeer.

Die Siriese Waarnemers vir Menseregte het gesê 10 mense is in Qadi Askar dood en minstens 99 ander het Donderdag weens geweld regoor die land gesterf, waarvan die meeste burgerlikes was.

– Volg Nuus24 op Twitter.