Kat-vrou is min gespin
2010-08-26 05:29
Londen – Die Britse vrou wat die teiken van ‘n haatveldtog op die internet geword het nadat sy op kamera gevang is waar sy ‘n kat in ‘n vullisdrom gooi, sê sy verstaan nie “waaroor die bohaai gaan nie”.
Mary Bale, ‘n 45-jarige bankwerker, het aan The Sun gesê sy het die kat in die drom gegooi “as ‘n grappie”. Sy het bygevoeg: “Dis net ‘n kat.”
Die kat, Lola, het vir 15 ure in die drom vasgesit totdat haar eienaars, Darryl en Stephanie Mann, haar hoor miaau het.
Hulle het uitgevind wat gebeur het nadat hulle beeldmateriaal van ‘n kringtelevisiekamera by hul huis nagegaan het. Hulle het dié kamera geïnstalleer omdat ander voertuie gedurig hul motor gestamp het.
‘n Facebook-veldtog is teen Bale geloods, met sommige mense wat selfs doodsdreigemente maak.
Bale sê egter die mense “oorreageer”.
“Ek weet nie waaroor die bohaai gaan nie. Dis net ‘n kat.”
Bale het verduidelik sy het van die werk af huis toe gestap toe sy die kat sien en dit begin streel het.
“Ek weet nie wat oor my gekom het nie, maar ek het net skielik gedink dit sal snaaks wees om die kat in die drom te sit, wat regs lank my was.
“Ek het dit as ‘n grappie bedoel omdat ek gedink het dit sou snaaks wees. Ek het nooit gedink dit sou vasgevang wees nie, ek het gedink dit sal net uit die drom uit wriemel.
“Mense lees te veel in dinge in. Ek het geen gevoelens, goed of sleg, oor katte nie.”
Die polisie sê Bale het nie ‘n kriminele oortreding began nie, maar die Koninklike Vereniging vir die Verhindering van Wreedheid teenoor Diere het ‘n ondersoek geloods en sal met haar praat.
Kyk hier na die beeldmateriaal.
- SAPA