'Kaptein van skande' wou glo in taxi vlug
2012-01-18 07:01
Kaapstad – Die “kaptein van skande” van die Italiaanse passasierskip Costa Concordia het glo probeer om in ’n taxi weg te kom van die toneel waar sy skip op die rotse geloop het.
The Telegraph het berig daar is in die Italiaanse media genoem die kaptein, Francesco Schettino, wou in ’n taxi wegry. Beamptes van die kuswag was glo verstom en het Schettino gevra of hy wil huis toe gaan. Die gesprek is glo deur die hawe-owerheid opgeneem.
Daar word aangevoer Schettino het opdragte verontagsaam om na sy skip terug te keer en beheer te neem.
Schettino het blykbaar slegs geantwoord “alles is oukei”.
Die kaptein word ook daarvan beskuldig dat hy eers 70 minute nadat die skip die rotse by die eiland Giglio aan die Italiaanse kus getref het die opdrag gegee het dat passasiers dit moet ontruim. Só berig die Italiaanse media nadat ’n staatsaanklaer, adv. Francesco Verusio, dit gister in ’n hof in Grosseto beweer het.
Schettino word aangehou nadat hy gister deur Italiaanse staatsaanklaers ondervra is.
Die Suid-Afrikaners wat oorleef het, sal teen die einde van die week na Suid-Afrika terugkeer, het mnr. Lebohang Mahlako, sekretaris by die Suid-Afrikaanse konsulaat in Rome, Dinsdag aan Die Burger gesê.
Twee ander Suid-Afrikaners, Laurence en Andy Davis, woon in Kanada en sal daarheen terugkeer.
Mahlako het besoek afgelê by Mike van Dijk en sy vrou, Narina, van Pretoria, sowel as by Faizal Agjee en sy gesin van Pietermaritzburg.
Hulle gaan tuis in ’n hotel wat deur die skeepsmaatskappy verskaf is. Volgens Mahlako gaan dit goed met hulle en niemand is beseer nie.
Me. Van Dijk het ná die voorval haar geliefdes op Facebook laat weet hulle leef: “Aan al ons pelle en belangstellendes en oproepies. thx a mil. ONS LEWE en is ok. baie deurmekaar nog maar ambassade gelukkig vir ons die basics gebring. wat ’n nagmerrie ondervinding!!!!!!!!”
Intussen is nog vyf lyke Dinsdag in die romp gevind, wat die dodetal op 11 te staan bring. Nog 24 mense word vermis.
– SAPA-AFP, SAPA-dpa en Reuters
– Volg Nuus24 op Twitter