Kaper ontsnap uit hospitaal
2010-03-18 15:11
Perth – ‘n Australiese man wat in ‘n ongeluk betrokke was met 'n gesteelde motor tydens ‘n hoë-spoed jaagtog het uit die hospitaal ontsnap.
Die 22-jarige Colin Bradley Little is van meer as 20 oortredings aangekla, insluitende gewapende roof, het polisie gesê.
Hy is onder toesig in ‘n hospitaal opgeneem sodat hy vir sy beserings behandel kon word.
Donderdagoggend toe hy in ‘n rolstoel uit die hospitaal ontslaan is het hy opgespring en weggehardloop, het supt. Gary Budge aan die Australian Broadcasting Corp. Radio gesê.
Volgens Budge was polisie nog besig om die voorval te ondersoek en hy kon nie bevestig of Little in boeie was nie.
“Ek sou so hoop,” het hy gesê.
Meer as 100 amptenare was op soek na Little en polisie het inwoners aanbeveel om hul huise en motordeure te sluit.
Volgens polisie het Little en ‘n 21-jarige vrou Woensdag ‘n motor gesteel nadat hulle die insittendes met ‘n hamer gedreig het.
Ná ‘n lang jaagtog deur die polisie , het Little die bestuurder van ‘n ander motor uit sy voertuig forseer en probeer om dieselfde met nog drie ander voertuie te doen.
Die jaagtog het geëindig nadat Little in ‘n polisievoertuig vasgejaag en die gesteelde motor omgeslaan het.
Die vrou wat as Little se medepligtige aangekla is, is in hegtenis geneem en sal Donderdag op twee aanklagte van motordiefstal in die hof verskyn.
- Sapa-AFP