Kanada: Twee dood toe reuse-tenk ontplof

2012-11-09 11:29

Montreal – Minstens twee mense is dood en 19 beseer toe ‘n asetoon-tenk by ‘n farmaseutiese aanleg in Kanada ontplof het, het beamptes gesê.

'n Tenk wat 15 000 liter asetoon berg, het by die Neptune Technologies-aanleg in die dorp Sherbrooke ontplof.

Rene Dubreuil, ‘n polisiewoordvoerder, het bevestig dat reddingswerkers die lyke van twee slagoffers gevind het, en dat ‘n derde werker onder die puin begrawe is.

Altesaam 19 mense is ná die voorval gehospitaliseer.

Dit is nog nie duidelik wat die ontploffing veroorsaak het nie. Beamptes het inwoners in die onmiddellike omgewing gerus gestel en gesê enige giftige gasse wat deur die ontploffing vrygestel is, is reeds deur die wind weggewaai.

– Volg Nuus24 op Twitter
 

- Sapa - AFP