Kalifornië: Leerder kritiek ná kind by skool losbrand
2013-01-11 08:20
Video - Nóg 'n skietvoorval in Aurora, Colorado
Vier mense is dood in nóg 'n skietvoorval in Aurora, Colorado, wat slegs 'n paar maande gelede deur 'n skietery by 'n bioskoop geruk is.
KYK
Kalifornië – ‘n 16-jarige leerder het Donderdag met 'n haelgeweer by ‘n hoërskool in Kalifornië ingeloop en ‘n skoolkind geskiet.
Die aanvaller het glo op nog ‘n kind geskiet, maar het misgeskiet. ‘n Onderwyser en ‘n ander personeellid het die aanvaller daarna oortuig om hom aan die polisie oor te gee.
Die leerder wat gewond is, is in 'n kritieke maar stabiele toestand, het Donny Youngblood, ‘n polisiewoordvoerder, tydens ‘n mediakonferensie gesê.
Hy het bygevoeg dat ‘n onderwyser by die Taft Union-hoërskool ook ‘n geringe besering opgedoen het.
Die aanval kom minder as ‘n maand na ‘n gewapende man 20 skoolkinders en ses vroue by die Sandy Hook-laerskool in Newtown in Connecticut doodgeskiet het.
Pres. Barack Obama het na dié voorval beloof om opnuut erns te maak met die kwessie van vuurwapengeweld in die VSA.
Adjunkpres. Joe Biden, wat deur Obama in beheer geplaas is van die inisiatief, het gesê hy sal teen volgende week nuwe beleidsvoorstelle aan die president oorhandig.
Die aanvaller, wie se naam nog nie bekend is nie omdat hy minderjarig is, is volgens ander leerders by die skool gereeld gespot.
– Volg Nuus24 op Twitter
- Sapa - AP
