Juweelrower gaan lank sit
2010-08-07 09:49
Londen – Die vermomde gewapende man wat by ’n luukse juwelierswinkel ingebars en een van Brittanje se grootste rooftogte ooit uitgevoer het, is gister tot 23 jaar tronkstraf gevonnis, presies ’n jaar ná die misdaad.
Amam Kassaye (25) was deel van ’n goed georganiseerde bende wat weggekom het met juwele ter waarde van meer as £40 miljoen (R461 miljoen) by die Graff Diamonds-winkel in Bond Street, Londen. Hul buit moet nog teruggevind word. Versekeraars het ’n beloning van £1 miljoen (R11,53 miljoen) aangebied vir inligting wat tot die opsporing daarvan kan lei.
Kassaye het die winkel binnegegaan, ’n geweer teen die winkelassistent, me. Petra Ehnar, se rug gedruk en haar gedwing om die vertoonkaste leeg te maak. Sy is tydelik as gyselaar aangehou voordat hy en ’n medepligtige gevlug het.
Kassaye se verdedigingspan het in die hof beweer dat die rooftog op 6 Augustus 2009 nie deur Kassaye uitgevoer is nie, maar eerder “deur iemand wat merkwaardig baie soos hy gelyk het”.
Ehnar het hom egter as die rower uitgeken. Die aanklaer, mnr. Philip Bennets, het aan die jurie gesê haar aanvaller se spesiale karaktertrekke “sal vir ewig in haar gedagtes ingeëts wees”.
Kassaye en sy bende het professionele grimering en ’n reeks wegkomvoertuie gebruik, asook spervoertuie om die polisie te vertraag, en sy wapen telkemale afgevuur om winkelgangers en omstanders te laat duik vir veiligheid.
Drie ander betrokkenes – Solomun Beyene, Clinton Mogg en Thomas Thomas – is elk tot 16 jaar tronkstraf gevonnis.
- Sapa - AP