Jou gene bepaal of jy drinkebroers na-aap
2010-07-26 08:23
Nederland - Wat gebeur wanneer jy by die kroeg instap en sien hoe een van jou vriende ’n koue bier bestel?
Koop jy dadelik ook een en drink saam, of hou jy by jou voornemens om net ’n gaskoeldrank te drink?
Navorsers van Nederland het pas bevind jou gene bepaal in watter mate jy deur jou vriende beïnvloed word om saam te drink.
Luidens ’n artikel in Psychological Science, ’n joernaal van die internasionale vereniging vir die wetenskap van sielkunde, verhoog alkohol dopamienvlakke in die brein.
Dopamien is ’n chemiese stof wat plesier verskaf en mense laat goed voel.
Vorige studies het getoon die dopamienreseptor-geen (DRD4) is betrokke by mense se motivering om belonings te soek.
Navorsers van die Radboud Universiteit in Nederland het ’n variant van dié geen ondersoek om te kyk of dit ’n rol speel by die feit dat sekere mense begin smag na alkohol in reaksie op sekere seine in die omgewing.
Vrywilligers is na ’n laboratoriumkroeg genooi. Die vertrek is versier nes ’n Nederlandse kroeg.
Hul taak was om punte toe te ken vir ’n reeks advertensies en dan ’n ’n halfuur ruspouse te neem.
In dié pouse kon hulle enige alkoholiese of nie-alkoholiese drank by die kroeg drink.
Sekere deelnemers is vooraf aangesê om dadelik drank te bestel.
Die navorsers het gekyk watter ander deelnemers volg hul voorbeeld en speekselmonsters is geneem vir DNS-toetse.
Die resultaat het getoon daar was ’n ooreenstemming tussen die hoeveelheid wat die drinkers gedrink het, die geenvariant in die speeksel en die ander deelnemers se drinkgedrag.
As die drinkers meer as drie of vier drankies geneem het, het deelnemers met die spesifieke geenvariant meer as twee keer meer gedrink as deelnemers sonder die geenvariant.
As die drinkers net een drankie gedrink het, was daar geen verskil tussen die gedrag van dié met die geen dra en dié daarsonder nie.
Die navorsers meen draers van die DRD4-geenvariant wat bestudeer is, is wanneer hulle tyd deurbring saam met hul drinkebroers dalk meer geneig as ander om baie te drink of drank te misbruik.