Jongmense op sokkerveld afgemaai
2011-01-24 23:00
Mexiko Stad - Ses jongmense is doodgeskiet en nog vier is beseer op ‘n sokkerveld van ‘n gemeenskapsentrum in Mexiko, het die owerhede gesê.
Die skietery het in Ciudad Juarez, in die noorde van Mexiko, plaasgevind.
Carlos Gonzalez, ‘n polisiewoordvoerder, het aan die Duitse nuusagentskap DPA gesê ‘n 12-jarige meisie tel onder die beseerdes, hoewel sy nie in ‘n kritieke toestand is nie. Die res van die beseerdes is in ‘n “delikate, maar stabiele” toestand.
Die aanval het Sondagmiddag kort voor die begin van ‘n wedstryd gebeur. Drie mense is op die toneel dood en drie het later in die hospitaal gesterf.
Die polisie het 180 koeëldoppies van verskeie kalibers, insluitende dié van ‘n AK-47, op die toneel gevind.
“Hulle het in drie voertuie opgedaag en aangeval,” het Adrian Sanchez, nog 'n polisiewoordvoerder, gesê.
Die gemeenskapsentrum is enkele maande gelede geopen. Dit is deel van ‘n federale program om die geweld- en dwelmgeteisterde stad se maatskaplike toestand te verbeter.
Ciudad Juarez word as die gewelddadigste stad in Mexiko beskou. Dwelmverwante misdaad het verlede jaar meer as 2 700 lewens in die stad geëis.
- Volg Nuus24 op Twitter
- Sapa-DPA