Jong verpleegster vas vir moord op pasiënte
2011-07-20 17:14
Londen – Britse ondersoekbeamptes het ‘n 26-jarige verpleegster in hegtenis geneem in verband met die moord op drie pasiënte.
Polisie vermoed die verpleegster het die pasiënte met insulienbesmette soutoplossing ingespuit.
Die vrou het by die Stepping Hill-hospitaal in Stockport in die noordwestelike deel van Engeland gewerk.
Polisielede is verlede week na die hospitaal ontbied oor soutoplossing waarmee mense glo doelbewus gepeuter het.
‘n Vrou en twee mans se raaiselagtige dood word met die besmetting verbind, terwyl ‘n vierde pasiënt in ‘n kritieke toestand is.
“Vanoggend is ‘n 26-jarige vrou in hegtenis geneem onder verdenking van die moord. Sy sal in polisie-aanhouding bly vir ondervraging...” het ‘n woordvoerder vir die polisie in Manchester gesê.
‘n Polisiebron sê die vrou is ‘n verpleegster.
Elf uit die veertien pasiënte wat aanvanklik deur die besmetting geaffekteer is, het oorleef.
Chris Burke, uitvoerende hoof van die hospitaal, het gesê die personeel is “geskok, met afgryse vervul en kwaad” oor die voorval.
Volg Nuus24 op Twitter.
- Sapa - AFP