Jong verloofde soldaat sterf in Afganistan
2011-02-03 11:01
Canberra – ‘n Australiese soldaat is dood nadat ‘n plofbare toestel in Afganistan ontplof het.
Korp. Richard Edward Atkinson (22) is dood terwyl hy in die Uruzgan-provinsie in die suide van Afganistan gepatrolleer het. Sy sterfte bring die dodetal van Australiese soldate tot 22.
Volgens lt.genl. David Hurley, waarnemende hoof van die verdedigingsmag, was Atkinson op sy eerste ontplooiing na Afganistan.
‘n Tweede soldaat is tydens die ontploffing ernstig beseer. Hy is tans in ‘n goeie toestand in ‘n militêre hospitaal.
“Die hele Australiese verdedigingsmag en verdedigingsgemeenskap is baie hartseer oor die dood van hierdie goeie, jong soldaat,” het Hurley oor Atkinson, wat ‘n verloofde man was, gesê.
Australië, wat 1 550 troepe in Afganistan het, het die grootste militêre toewyding in dié land as enige ander land buite die Noord-Atlantiese Verdragsorganisasie (Navo).
Volg Nuus24 op Twitter.
- Sapa - AP