Jong meisies sterf in yskoue see
2010-03-08 04:08
Oslo – Twee jong meisies is dood nadat hulle deur ‘n golf op Noorweë se westelike kus die see in meegesleur is en meer as ‘n uur lank in die yskoue water spandeer het, het polisie gesê.
Polisie vermoed dat dié twee negejarige meisies saam met ‘n ander meisie op die rotse langs die kus in die dorpie Kristiansund gespeel het toe die voorval plaasgevind het.
“Die weer was sleg en daar was groot golwe. Ons het geen ooggetuies wat kan bevestig dat hulle deur ‘n golf meegesleur is nie, maar dit is ‘n baie groot moontlikheid,” het Harald Roenning, ‘n polisiewoordvoerder, gesê.
Die meisies se lyke is ‘n uur later in die water gevind.
- Sapa