Joernalis dramaties bevry
2009-09-09 09:02
Afganistan - ‘n Verslaggewer van New York en sy Afgaanse tolk is bevry nadat hulle deur Talibantroepe in Afganistan aangehou is.
Gewapende rebelle het die Ierse joernalis Stephen Farrell en sy kollega Sultan Munadi Saterdag ontvoer terwyl hulle verslag gedoen het oor die NAVO-lugaanval nadat talle landsburgers en rebelle in die noorde van Kunduz gesterf het.
Munadi het egter nie die dramatiese bevryding oorleef nie.
Navo se internasionale veiligheidsbystandsmag (Isaf), wat die Afgaanse troepe help veg teen die Taliban, het sy vrylating bevestig.
"Kommando's het vroeg Woensdagoggend talle kampe in Kundus binnegeval en die New York Times se joernalis Stephen Farrell en sy kollega gered," het Isaf aan AFP vertel.
Farrell het geen beserings tydens die dramatiese reddingspoging opgedoen nie, maar die 34-jarige Munadi, 'n pa van twee wat tyd afgevat het van sy studies in Duitsland, is doodgeskiet.
Farrell (46) het in ‘n kort telefoonoproep aan die New York Times se buitelandse redakteur Susan Chira gesê: “Ek is uit, ek is vry!”, het die koerant berig.
Farrell het gesê hy en sy mede-gevangenesse het ‘n helikopter gehoor nader kom kort voor die reddingstog. “Ons was almal saam in ‘n kamer, maar die ontvoerders het uitgehardloop. Ons het gedink die mans gaan ons doodmaak, en toe vlug ons” het Farrel gesê.
Hy en Munadi het Britse stemme gehoor en besluit om na dié mense te hardloop. 'n Skietgeveg het uitgebreek, maar die joernalis het met sy lewe weggekom.
Die ontvoering was tot nou toe stilgehou om die twee mans se veiligheid te kon verseker.
- Sapa-AFP