Joernalis doen breinoperasie in Haïti
2010-01-19 11:19
Port-au-Prince - ‘n Mediese korrespondent vir CNN en neurochirurg, Sanjay Gupta, moes glo ‘n breinoperasie op ‘n 12-jarige meisie in Haïti doen.
Die meisie, wie se naam nie bekend gemaak is nie, is ernstig beseer tydens die verwoestende aardbewing wat die land verlede week getref het.
Sy moes dringend ‘n operasie ondergaan om ‘n stukkie beton van sowat 1,2 cm uit haar skedel te verwyder, het die Sydney Morning Herald Dinsdag berig.
Gupta is weens ‘n drastiese tekort aan mediese personeel gevra om uit te help tydens die operasie, wat aan boord van ‘n Amerikaanse weermagskip gedoen is.
Nuus24 het Maandag berig dat ‘n vyfjarige meisie se hand geamputeer is sonder enige verdowing nadat sy tydens die aardbewing beseer is.
Volgens Regan Ree, ‘n verpleegster, moes hulle Sandyna Pierre se hand amputeer maar was daar geen verdowingsmiddels of dokters beskikbaar nie.
Lees meer hier.