Japan-aardbewing: Dorp ontruim, kernaanleg veilig
2012-12-07 12:17
Tokio – ‘n Klein tsoenami van sowat 'n meter hoog het Vrydag teen die noord-oostelike kus van Japan uitgespoel ná ‘n sterk ondersese aardbewing naby die kus.
Die aardbewing is naby die gebied wat in Maart 2011 erg deurgeloop het toe 'n tsoenami 'n groot deel van die kus in die noordooste verwoes het en die lewens van duisende mense geëis het.
Meteoroloë sê die golf het Ishinomaki-stad eerste getref.
Daar was geen onmiddelike berigte van sterftes nie.
Die aardbewing, met 'n sterkte van 7,3, is gevolg deur ‘n naskok wat 6,2 gemeet het.
Inwoners van die dorpie Minamisanriku in die Miyagi-distrik is aangeraai om na veilige, hoë grond te beweeg.
“Ons vra nou dat mense na hoër grond beweeg,” het Ryuichi Omori, ‘n regeringsamptenaar, in Minamisanriku aan die nuusagentskap AFP gesê.
“Die aardbewing is nie so groot nie, hoewel dit baie sterk gevoel het. Ons is besig om ‘n taakmag byeen te roep wat die slagoffers sal help.”
Geen skade is by die Fukushima Daiichi-kernkragsentrale aangemeld nie.
“Geen abnormale gebeure is tot dusver by ons ses reaktors gerapporteer nie,” het ‘n woordvoerder vir Tepco gesê.
Yoshihiko Noda, premier van Japan, is glo op pad na sy kantore in Tokio, van waar hy die gebeure sal monitor.
Treindienste in sekere dele van die land is ook vir eers gestaak.
– Volg Nuus24 op Twitter
- AFP
