Japan: Ontploffing by kernaanleg
2011-03-12 10:24
Tokio - 'n Ontploffing het by die Fukushima-kernaanleg in die noord-ooste van Japan plaasgevind, het Sky News en Japannese televisiekanale Saterdagoggend berig.
Ooggetuies het glo vertel dat 'n ontploffing by die aanleg gehoor is, en het gesien hoe wit rook bo die gebou uitborrel.
Luidens berigte wat op Japannese televisiekanale verskyn het, is twee werkers glo beseer. Een van hulle is in 'n hyskraan se beheerkamer vasgekeer, en is moontlik baie ernstig beseer.
'n Gebou op die aanleg se terrein se mure en dak is glo in die ontploffing vernietig.
Dis steeds nie duidelik of dié ontploffing 'n gevolg is van probleme met die kernaanleg se verkoelingstelsel nie.
Japan se Kyodo News het gesê die uurlikse radioaktiewe straling vanuit die aanleg is gelyk aan die toelaatbare jaarlikse dosis.
Televisiekanale het mense in die omtrek van die aanleg gewaarsku om binneshuis te bly en nie kraanwater te drink nie.
Die meeste van die 51 000 mense wat in 'n tien-kilometer-radius om die aanleg bly is egter reeds ontruim.
Radioaktiewe sesium is Saterdag naby die Nommer-een-kernaanleg by Fukushima gevind, wat vrese laat ontstaan dat 'n kernramp moontlik kan volg.
Intussen is 'n massiewe militêre reddingsoperasie in Japan van stapel gestuur ná die verwoestende tsoenami wat die land Vrydag getref het in die nadraai van 'n 8.9-aardbewing.
Premier Naoto Kan het gesê 50 000 weermaglede is beskikbaar gestel om te help met reddings- en opruimingswerk ná een van die grootste natuurrampe in menseheugenis.
Honderde mense het gesterf in die tsoenami wat Vrydag deur die noord-ooste van Japan gevee het.
Die amptelike dodetal staan tans op 413, met 784 mense wat steeds vermis word en 1 128 wat beseer is. Dié syfers kan egter skerp styg namate reddingswerkers nader aan die gebiede beweeg waar die meeste skade aangerig is.
- Volg Nuus24 op Twitter.