Japan: Betogers sien rooi oor kernkrag

2012-07-29 16:58

Tokio – Duisende mense het Sondag 'n "menseketting" om die Japanse parlementsgebou gevorm om protes aan te teken teen die regering se gebruik van kernkrag.

Die betoging is die jongste in 'n rits protesoptogte teen die gebruik van kernkrag ná die Fukushima-kernramp in Japan in 2011.

Betogers het gesê hulle is ongelukkig omdat die regering vroeër die maand twee kernreaktors weer in werking gestel het, ten spyte van die ramp in Fukushima in Mei verlede jaar.

Die aktiviste, wat van 'n park in Tokio af geloop het, het op tromme geslaan en ballonne en baniere gebruik om aandag te trek. Hulle het op die sypaadjie om die parlementsgebou rye gevorm en gedreunsing teen die gebruik van kernkrag.

"Al hierdie mense het saamgekom en verhef hulle stemme," het Shoji Kitano, 64, 'n afgetrede wiskunde-onderwyser, gesê. Hy het 'n banier gedra wat lees "Nee vir kernkrag."

Kitano het gesê hy het in die 1960's laas sulke betogings gesien. Hy het benadruk dat die mense van Japan nie gewoonlik aan betogings deelneem nie, maar dat hulle hoogs ontsteld is oor die huidige stand van sake.

– Volg Nuus24 op Twitter.

- Sapa - AP