Italië onder voogdyskap van IMF geplaas
2011-11-05 07:25
Den Haag - Italië is by die spitsberaad van die G20 – die wêreld se 20 rykste lande – in Cannes, Frankryk, in die praktyk onder voogdyskap van die Internasionale Monetêre Fonds (IMF) geplaas.
Terselfdertyd het die 20 regeringsleiers besluit dat die IMF meer slaankrag moet kry om die finansiële krisis te bestry. Weens onenigheid tussen veral die VSA en Europa kon geen besluit geneem word oor hoe dit moet gebeur nie. Buite die EU is daar min geesdrif om die groep met kontant te help.
Silvio Berlusconi, Italiaanse premier, moes by die beraad opdaag met uitgewerkte planne oor hoe sy land gaan voorkom dat hy dieselfde paadjie as Griekeland loop.
Die dreigende ineenstorting van die Griekse ekonomie, wat maar 2% van die bruto binnelandse produk van die Europese Unie (EU) bedra, kan nog met moeite gehanteer word, maar Italië het op twee na die grootste ekonomie in Europa. As hý omval, is dit nag vir Europa.
Tog het Berlusconi, wat deur ’n grootskaalse rebellie in sy regerende koalisie verlam is, basies met leë hande opgedaag. Dr. Angela Merkel, bondskanselier van Duitsland, en pres. Nicolas Sarkozy van Frankryk, wat die stang die laaste dae gebyt het, het die Italianer twee keer eenkant toe geneem om hom goed uit te trap.
Luidens berigte in die Duitse pers het Merkel vir hom gesê sy woorde tel nie meer veel nie, net sy dade. Sarkozy het glo reguit gesê Berlusconi se politieke geloofwaardigheid is na aan nul.
Daarby het pres. Barack Obama van die VSA sy gewig ingewerp agter ’n voorstel om Italië onder voogdyskap van die IMF te plaas. Dié liggaam moet toesien dat Italië sy ekonomie en begroting regruk.
Berlusconi het in die openbaar agter ’n vyeblaar probeer wegkruip – Italië het om die toesig “gevra”, het hy gesê, maar dit was baie duidelik dat hy gedwing is. Die kans is in elk geval goed dat hy sy premierskap aanstaande week kan verloor.
Intussen het Giorgios Papandreou, Griekse premier, gister wanhopig in die Griekse parlement om sy politieke lewe geveg.
Ná die vernederende wyse waarop Merkel en Sarkozy hom gedwing het om die beplande referendum oor die reddingspakket vir Griekeland af te stel, is hy gedwing om ’n mosie van vertroue in die parlement te vra.
Die stemming sou eers laat gisteraand gebeur, maar Papandreou het nominaal ’n meerderheid van slegs twee in die parlement.
Met ’n onbekende aantal lede van sy party wat geen vertroue meer in hom het nie, het sy politieke lewe aan ’n dun draadjie gehang.
Die moontlikheid het ook steeds bestaan dat Griekeland die euro én die EU moet verlaat. Een kommentator het opgemerk dat die drachma, die ou Griekse munteenheid, in só ’n geval deur die vloer sal val en inflasie tot teen die dak sal vlieg.
- Die Burger