'Passasierskip was nie van koers af nie'
2012-01-14 22:50
Italië – Die hoof van die maatskappy wat die Italiaanse passasierskip besit wat gestrand het, het Saterdag volgehou die skip was nie van koers af nie.
"Dit is nie korrek om te sê die boot was van koers af nie," het Gianni Onorato, president van Costa Crociere, aan verslaggewers by Porto Santo Stefano, naby die plek waar die ongeluk gebeur het, gesê.
Die Costa Concordia se romp is Vrydagaand beskadig toe dit aan die Toskaanse kus gestrand het. Drie mense is oorlede.
Volgens Onorato het die skip teen rotse gegaan.
Hy het sy medelye betuig met die families, passasiers en bemanningslede wat geliefdes in die ongeluk verloor het.
Dit is die eerste ongeluk in die geskiedenis van die maatskappy se bestaan en hulle gaan seker maak dat so iets nie weer gebeur nie, het Onorato gesê. Costa Crociere bestaan reeds 60 jaar.
Volgens hom is hul eerste prioriteit om die passasiers terug by hul families te kry.
Altesaam 30 mense is volgens berigte beseer, en twee van hulle is in 'n kritieke toestand. Sewentig ander word nog vermis.
Die skipbreukelinge het skuiling gevind in skole, hotelle en 'n kerk op die klein Toskaanse eiland Giglio. Ander is na Porto Santo Stefano aan die Italiaanse kus geneem.
Intussen is die kaptein van die skip, Francesco Schettino, in hegtenis geneem en hy staar moontlike aanklagte van strafbare manslag in die gesig.
Schettino kan moontlik ook aangekla word omdat hy die skip eerste verlaat het en nie gewag het dat al die passasiers eers gered moet word nie.
– Volg Nuus24 op Twitter.
- Sapa - AFP