Israel bied geen verskoning
2010-06-03 10:35
Tel Aviv – Israel vra nie verskoning nie.
Terwyl strate wêreldwyd, van Londen tot Istanboel, Woensdag vol betogers was wat Israel vir sy aanval op noodlenigingskepe in die Middellandse See veroordeel het, het die Israelse bevolking hul grotendeels by hul weermag geskaar.
Israelse koerante was vol foto’s van Benjamin Netanyahu, premier, wat die gewonde soldate in die hospitaal besoek.
Die Israelse regering het volgehou die aanval was “noodsaaklik”.
Terwyl talle lande die kop van Ehud Barak, minister van verdediging, geëis het, het Barak die Shayetet 13, die weermageenheid wat in die voorval betrokke was, bemoedig met die woorde: “Hierdie is nie Wes-Europa nie. Daar is geen beloning vir swakkelinge nie en geen tweede kans vir diegene wat versuim om hulself te verdedig nie.”
Onderliggend aan al die bravade was daar egter ’n gevoel van vrees dat Israel weens die laaiende spanning nader aan ’n oorlog met sy bure is as in jare.
Op ’n besoek aan die Libanese grens is Beeld deur lt. Lital Schocket, weermagwoordvoerder, te woord gestaan.
“In die Midde-Ooste weet ’n mens nooit wat om te verwag nie. Maar ons sien ’n groot opgaar van wapens deur Hizbollah – hulle het reeds 1 000 missiele wat Tel Aviv kan bereik.”
Op die Siriese grens van die Golanhoogte het maj. Uzi Maor, ’n senior weermaglid, daarop gewys dat hulle drie weke gelede uitgevind het Sirië het sowat 2 000 Scud-missiele wat Tel Aviv sou kon tref.
In Sderot, op die Gasa-grens, het inwoners aan Beeld vertel hulle loop minder gereeld onder Kassam-missiele uit Gasa deur as voor verlede jaar se oorlog, maar daar het verlede week twee Kassams uit Gasa in die dorp geval.
Vyf Palestyne is in Gasa deur die Israeli’s geskiet.
Volgens die weermag was drie van hulle van die Islamitiese Djihad, wat ’n missiel oor die Israeli-grens wou skiet.
In die land se grootste Engelse dagblad, The Jerusalem Post, het die politieke ontleder Shira Kaplan selfs bespiegel Israel se aanvalle op die noodlenigingskepe kon ’n poging deur die Joodse staat gewees het om ’n konfrontasie met Iran, finansierder van Gasa se Hamas-regering, te verhaas.
Amptelik het die Israeli-regering egter enige bybedoelings met die aanvalle ontken.
“Ons het reeds vasgestel dat die skepe ‘koue’ wapens na Gasa vervoer het – messe, pype en bofbalkolwe,” het Schocket aan Beeld gesê.
- Beeld
- Beeld