Islam-fanatici kap onnie se hand af
2010-07-05 15:00
Nieu-Delhi - Radikale volgelinge van die Islamitiese geloof het 'n kollege-lektor in Indië se hand afgekap.
Die lektor is daarvan beskuldig dat hy 'n beledigende verwysing na die profeet Mohammed in 'n eksamenvraestel gesit het, het 'n plaaslike koerant Maandag berig.
TJ Joseph was Sondag op pad huis toe ná 'n kerkdiens in die sentrale Ernakulam-distrik toe hy aangeval is, het die Times of India berig.
Volgens sy suster Mary Stella, 'n non, het hulle pas in hul motor geklim toe sowat agt mense, met swaarde en messe bewapen, die voertuig storm.
"Hulle het die voorruit gebreek, sy regterhand afgekap en hom in die linkerdy gesteek," het sy aan die koerant beskryf.
Die groep het glo ook ploftoestelle afgesit voor hulle op die vlug geslaan het.
Die 52-jarige lektor is na 'n plaaslike hospitaal gestuur. Sy toestand is stabiel, maar ernstig.
Islamitiese groepe het in Maart betoog oor 'n vraag in een van Joseph se vraestelle wat verwys het na 'n gesprek tussen die profeet Mohammed en God in die film Garshom.
Twee aktiviste, wat glo lede van die Popular Front, 'n organisasie van gelowiges, is, is Sondag in verband met die voorval gearresteer.
Volg Nuus24 op Twitter.
- Sapa-DPA