Iran dreig VSA met sluiting van olieroete
2012-01-04 07:37
Den Haag – Iran en die Weste het Dinsdag op ’n konfrontasie afgestuur met ’n Iranse dreigement teen die Amerikaanse Vyfde Vloot met sy tuisbasis in Bahrein.
Luidens ’n berig wat die Iranse nuusagentskap Irna die wêreld in gestuur het, en onmiddellik deur talle media verder versprei is, het die hoof van die land se weermag, genl. Ataolla Salehi, gesê Iran sal optree as die Amerikaanse vliegdekskip in die omgewing na Bahrein terugkeer.
Die betrokke vliegdekskip, die USS John C. Stennis, het Bahrein vyf dae gelede verlaat en deur die Straat van Hormoez na die Arabiese See gevaar, van waar sy vliegtuie operasies in Afganistan sal steun.
Salehi het dreigend daaraan toegevoeg dat Iran nie sy waarskuwing sal herhaal nie. “Ek raai die Amerikaanse vliegdekskip aan om nie na die Persiese Golf terug te keer nie.”
Hy het nie besonderhede gegee van watter optrede hy bedoel nie. Maar die Iranse vloot het pas tien dae van vlootoefeninge in die Golf voltooi, waartydens drie nuwe missiele getoets is.
Die missiele het na bewering ’n reikafstand van honderde kilometers.
Iran het gesê die doel van die maneuvers was om vir die sluiting van die strategiese Straat van Hormoez te oefen. Iran dreig om dié waterweg af te sluit indien ekonomiese sanksies teen hom verder verskerp word.
Olie word langs dié roete uit Irak, Koeweit, Saoedi-Arabië en die olieryke Golfstaatjies na die wêreldmarkte vervoer. Iran het gesê as hy die straat sluit, sal dit die olieprys – wat nou net meer as $100 (R810) per vat is – moontlik laat verdubbel.
Intussen het Alain Juppé, Franse minister van buitelandse sake, die lidlande van die Europese Unie (EU) gister in ’n onderhoud met die Franse televisie opgeroep om strenger sanksies in te stel in die lig van die Iranse pogings om kernwapens te ontwikkel.
Die EU moet die VSA se voorbeeld volg deur Iran se buitelandse bates te bevries en ’n olieboikot teen hom te begin, het hy gesê.
Die Iranse geldeenheid het die laaste dae met meer as 10% gedaal na aanleiding van die spanning.
– Die Burger
– Volg Nuus24 op Twitter
- SAPA