Iran: Vier mans gehang na roof en verkragting
2011-10-12 13:21
Tehran, Iran – Vier mans wat mense by ‘n private partytjie in Iran beroof het en talle vroue ontvoer en verkrag het, is Woensdag voor ‘n skare van duisende gehang, het Iranse media berig.
Die mans, tussen 20 en 25 jaar oud, was deel van ‘n bende van 15 lede wat in Mei met messe en knuppels by ‘n partytjie in Khomeni Shahr ingestorm het.
Nadat die mans wat die partytjie bygewoon het, oorval en vasgebind is, het die bende die vroue ontvoer en na ‘n nabygeleë villa geneem waar hulle verkrag is, het die ISNA-nuusagentskap berig.
Die mans het almal polisierekords vir die gebruik van alkohol – wat in Iran verbied is – ontvoering en die onwettige besit van wapens.
Vyf ander lede van die bende is 28 jaar tronkstraf en 74 sweephale vir hulle betrokkenheid by die roof toegedien.
Vier verdagtes is nog op vrye voet.
– Volg Nuus24 op Twitter.
- AFP