Irak: Minstens 32 in aanvalle dood

2012-09-30 17:05

Bagdad – Minstens 32 mense is Sondag in bomontploffings en skietvoorvalle in Irak dood terwyl 104 beserings opgedoen het, het sekuriteits- en mediese beamptes gesê.

Die geweld het in Bagdad en omliggende omgewings van Taji, Madain en Tarmiyah plaasgevind. Volgens 'n beampte van die ministerie van binnelandse sake is 25 mense weens die geweld dood met 59 wat gewond is.

Drie motorbomme het naby Baquba, noord van die hoofstad, ontplof. Drie mense is in die ontploffing dood terwyl 19 ander beserings opgedoen het, het sekuriteitsbeamptes en 'n dokter gesê.

'n Burgerlike en drie polisiebeamptes is dood nadat 'n motorbom in Kut, suid van Bagdad ontplof het. Sewe mense is tydens die ontploffings gewond, het 'n polisiekaptein en 'n mediese beampte gesê.

Vyftien mense het beserings opgedoen nadat 'n motorbom in die noordelike stad Mosul ontplof het.

– Volg Nuus24 op Twitter.

- Sapa - AFP