Britte vies oor inbrekerbeskerming
2011-02-14 07:48
Londen - Die polisie het inwoners van Kent en Surrey in Engeland beveel om maasdraad voor vensters te verwyder omdat dit inbrekers kan beseer.
Inwoners van nedersettings hier het gesê hulle is woedend omdat hulle as misdadigers gebrandmerk word weens die beskerming van hul eiendom, het die Britse koerant Mail on Sunday Sondag berig.
Die inwoners het vensters met die draad beveilig ná ’n reeks inbrake by gereedskapskure op hul erwe, maar gemeenskapspolisielede het gesê dit kan meebring dat inbrekers skadevergoeding eis, omdat hulle hulself hiermee beseer.
Thomas Cooper van Tatsfield, Surrey, het gesê hy het die draad om drie van sy tuin-huisies gesit ná twee inbrake die afgelope vier jaar.
“Wat moet jy doen? Hulle toelaat om jou goed te vat? Dit is belaglik dat die wet hulle beskerm, hoewel hulle dit verbreek.”
Samantha Cullum van Brasted in Kent het gesê haar hele tuin-huisie is gesteel. Diewe het dit in die nag op ’n vragmotor gelaai.
Die polisie het gesê hulle raai mense voortdurend aan om die inhoud van hul tuin- en motorhuise te beskerm, maar ’n voor die hand liggende benadering moet gevolg word.
Hulle moet slotte van hoë gehalte gebruik en nie tuisgemaakte toestelle nie, want dit kan tot beserings lei. Maasdraad “is nie een van die voorstelle wat ons sou maak nie”, het ’n polisielid gesê.
- Volksblad