Internetliefde kos vrou miljoene dollars

2013-02-08 08:20

Sydney – 'n Enkellopende vrou van Adelaide is A$480 000 (sowat R4,4 miljoen) kwyt ná sy bedrieg is deur 'n man wat sy op die internet ontmoet het, het die polisie Vrydag gesê.

Die 48-jarige vrou het A$80 000 (sowat R734 000) gestuur voor 'n ander man haar kontak het om te sê sy is verkul. Dié man sou haar help om haar geld terug te kry. Sy het toe nóg A$400 000 (sowat R3,6 miljoen) inbetaal voor sy besef het sy is twee keer bedrieg.

"Indien jy reeds geld gestuur het en 'n versoek ontvang om nóg geld te stuur, moet mense dit sien as die bedrieër se poging om nóg geld te kry," het speurinsp. Greg Hutchins gesê.

Hutchins het gesê dis feitlik onmoontlik om die geld terug te kry omdat die bedrieërs nie opgespoor kan word nie. Hy het ook gesê dit is moeilik om die misdadigers in ander lande te vervolg.

Eensame Australiërs word maandeliks uit meer as A$2,5 miljoen (sowat R22 miljoen) bedrieg. Slegs 'n paar sake word aangemeld en die res bly stil daaroor.

– Volg Nuus24 op Twitter

- SAPA