Internet, selfone in Sirië van lyn af

2011-06-24 13:37

Kaïro – Internet- en selfoondienste is Vrydag in dele van die Siriese hoofstad Damaskus opgeskort kort voor groot teenregeringsbetogings regoor die land.

The Local Coordination Committees of Syria, die aanlyngroep wat oor die betogings berig, het gesê die netwerke is in die voorstede Douma en Harasta afgesny.

Die groep het ‘n dokument uit die hoof van staatsekerheid se kantoor gepubliseer wat bevel gee om die internet in die ooste op te skort en te vertraag in die res van die land.

Daar is tans geen onafhanklike bevestiging oor die betroubaarheid van die brief nie.

Internet- en telefoondienste is sedert die begin van die opstande drie maande gelede erg vertraag.

Meer as 1 300 burgers is dood en 10 000 is aangehou sedert die betogings in Maart opgevlam het.

Betogers dring aan op die uittrede van president Bashar al-Assad.

– Volg Nuus24 op Twitter.
 

- Sapa-DPA