Inligting oor swanger Kate deur fopoproep verkry

2012-12-05 18:14

Londen – Die Britse hospitaal waar Prins William se swanger vrou Kate vir erge oggendnaarheid behandel word, het erken dat hulle geviktimiseer is deur ‘n fopoproep wat inligting oor die hertogin van Cambridge gesoek het.

King Edward VII se hospitaal het Woensdag erken dat ‘n Australiese radiostasie die fopoproep na die hospitaal gemaak het.

‘n Vrou wat die stem van koningin Elizabeth II nagemaak het, het gevra hoe dit met Catherine se gesondheid gaan. Sy is toe geantwoord dat Catherine nie meer opgooi nie en dat sy aan en af slaap.

Die hospitaal het bygevoeg dat die gesprek met een van hul verpleegkundiges gevoer is. Die hospitaal se telefoon-beleid word nou hersien.

Die Australiese radiostasie 2DayFM het ‘n opname van die gesprek op hul webtuiste geplaas.

Intussen is prinses Kate besig om beter te voel.

“Die hertogin van Cambridge is besig om beter te voel. Sy en die hertog is verskriklik dankbaar vir die goeie wense wat hulle gekry het. Sy sal nog op die oomblik in die hospitaal bly,” het ‘n verklaring van die koninklike famile gelui.

William het glo belowe om alles in sy mag te doen om Kate van die media te beskerm tydens haar swangerskap, het Showbizspy.com berig.

“William het nog altyd die media wantrou,” het ‘n bron gesê.

“Dit kom uit sy kinderdae uit toe hy moes toekyk hoe sy ma opgebou was deur die media en toe weer deur hulle afgebreek is. Hy glo tot vandag toe nog dat hulle verantwoordelik was vir sy ma se dood.”

– Volg Nuus24 op Twitter

- Sapa - AP