Indonesië steier ná twee rampe
2010-10-28 07:30
Djakarta. – Meer as 300 mense is tot dusver dood in die tsoenami en dodelike vulkaan-uitbarsting in Indonesië terwyl meer as 400 mense vermis en tienduisende dakloos gelaat is, het die owerhede gister gesê.
Een van Indonesië se aktiefste vulkane het Dinsdag rook en gas in die lug vrygestel en minstens 28 mense is dood en 14 beseer.
Berg Merapi, in die buitewyke van die stad Yogyakarta op die eiland Java, het uitgebars ’n dag nadat ’n tsoenami afgeleë eilande in die weste van Indonesië getref het.
Die dodetal in die tsoenami staan op minstens 282, het ’n provinsiale rampbestuursbeampte in Wes-Sumatra, Ade Edward, gesê.
Die tsoenami, wat gevolg het ná ’n aardbewing van 7,5 op die Richterskaal byna 80km wes van Suid-Pagai, het verskeie woongebiede en ’n oord vir branderplankryers platgevee. Minstens 411 mense word nog vermis, het Edward gesê.
Die nasionale rampbestuursagentskap het op sy webwerf gesê 4000 mense is weens die tsoenami dakloos gelaat.
Metro TV het beeldmateriaal uitgesaai van verwoeste woongebiede terwyl die oorlewendes deur die puin na besittings soek.
Die owerhede sukkel om albei rampe te hanteer en meer as 40000 inwoners is van die hange van Berg Merapi verwyder.
Kresno Heru Nugroho, ’n woordvoerder van die Sardjito-hospitaal in Yogyakarta, het gesê die 28 oorledenes van die vulkaan is dood weens kragtige sarsies warm lug wat deur die vulkaan vrygestel is.
Sy kollega, Endito Sri Andrianti, het gesê sommige van die slagoffers se lyke is verkool.
Baie Indonesiërs het huldeblyke op Facebook en Twitter geplaas vir die bejaarde geestelike beskermheer van die berg, Mbah Maridjan, wat vermoedelik ook dood is. Toetse word gedoen om vas te stel of een van die lyke wat gevind is, syne is. Indonesiërs glo dat Maridjan rituele magte gehad het wat die vulkaan in bedwang gehou het.
Volgens berigte is baie van die slagoffers in of naby Maridjan se huis in Kinahredjo gevind.
Indonesië se top-vulkanoloog, Suroni, het gesê Berg Merapi is vir eers “redelik kalm”, maar het gewaarsku dat dit van korte duur kan wees. “Reddingswerkers is steeds op die hoogste gereedheidsvlak.”
- Reuters