Indonesië: Sewe beseer ná ape mense aanval

2013-01-30 16:00

Makassar – ‘n Groep wilde ape het amok gemaak in ‘n dorp in die ooste van Indonesië toe hulle huise binnegegaan en inwoners aangeval het.

Sewe mense is in die voorval beseer en een is in ‘n kritieke toestand.

Ambo Ella, ‘n woordvoerder vir die Sidendeng Rappang-streek in die Suid-Sulawesi-provinsie, sê die aanval deur sowat 10 ape het in die Toddang Pulu nedersetting plaasgevind.

‘n Sestienjarige seun is erg gebyt in die aanval wat Maandag plaasgevind het. Hy word in ‘n hospitaal behandel.

Ella sê die trop het van ‘n nabygeleë woud gekom wat deur ‘n plaaslike stam beskerm word. Dit is onduidelik hoekom die ape, wat gewoonlik bang is vir mense en vlug wanneer hulle mense se stemme hoor, hulle aangeval het.

Plaaslike beamptes is besig met ‘n ondersoek om vas te stel wat tot die aanval gelei het.

– Volg Nuus24 op Twitter
 

- Sapa - AP