Indonesië: Leerders vas ná teenterreur-klopjag

2012-11-13 14:58

Jakarta – Altesaam 48 leerders en ‘n onderwyser van ‘n Islamietiese skool in Indonesië is in aanhouding ná die polisie op vuurwapens en skerp voorwerpe beslag gelê het, het ‘n woordvoerder gesê.

Polisiebeamptes het die Darul Akhfiya-skool Maandag bestorm en studente en onderwysers in hegtenis geneem. Hulle is oornag aangehou vir ondervraging.

“Die polisie het 48 studente en een onderwyser in hegtenis geneem ná die gemeenskap ongewone gedrag by die skool gerapporteer het,” het Boy Rafli Amar, nasionale polisiewoordvoerder, gesê.

Amar het bygevoeg dat die skool moontlik vir opleiding in terrorisme gebruik is.

“Die polisie het ook beslag gelê op gewere, ammunisie en skerp wapens.”

Die polisie in Indonesië het die afgelope paar maande ‘n rits teenterreur-klopjagte uitgevoer, insluitend ‘n klopjag op die Java-eiland waartydens 11 verdagtes in hegtenis geneem is wat beplan het om die Amerikaanse ambassade aan te val.

Indonesië word die afgelope dekade geteister deur terreur-aanvalle wat blameer word op die Jemaah Islamiyah-rebellegroep.

– Volg Nuus24 op Twitter
 

- Sapa - AFP