Indiese vliegramp: Oorlewendes beskryf neerstorting
2010-05-22 13:04
Bangalore – ‘n Air India Express-vliegtuig het Saterdag in Mangalore in die suide van Indië neergestort ná dit die aanloopbaan gemis het.
Die vliegtuig, wat vanaf Doebai na Indië gevlieg het en 160 passasiers aan boord gehad het, het daarna in vlamme uitgebars.
Die lewens van 159 mense is geëis nadat ‘n paar oorlewendes uit die brandende wrak ontsnap het.
“Sover ons weet is agt mense gered en na plaaslike hospitale in Mangalore vir behandeling geneem,” het Anup Shrivasta, die direksielid van Air India, tydens ‘n perskonferensie in Moembaai gesê.
Volgens ‘n polisiebeampte het een van die oorlewendes, ‘n sewejarige seun, later weens sy beserings gesterf.
Een oorlewende, Umer Farooq, het aan die NDTV-nuuskanaal vertel dat hy ‘n harde geluid gehoor het toe die vliegtuig geland het.
“Die vliegtuig het daarna van rigting verander en in die rigting van ‘n paar bome beweeg. Die kajuit het toe met rook gevul. Ek het aan ‘n paar kabels vasgehaak, maar het later uitgeklouter,” het Farooq vanuit sy hospitaalbed vertel.
Hy het brande aan sy arms, bene en gesig opgedoen.
KP Manikutty, ‘n ander oorlewende, sê hy het uit die brand ontsnap en slegs ligte beserings opgedoen.
Volgens hom het die passasiers geen waarskuwing gekry oor enige gevaar nie.
"Dit het gelyk asof ons veilig sou land," het hy vertel.
“Toe ons die grond raak het die vliegtuig onmiddelik begin ruk en oomblikke later iets getref. Dit het toe in die middel geskeur en in vlamme uitgebars. Ek het by die gaping uitgespring,” het hy gesê.
Die nasionaliteite van die passasiers is nog nie bekend nie.
- AFP
Volg Nuus24 op Twitter.