Indië sê Pakistan het grensaanval beplan

2013-01-14 10:40

Indië – Die land se weermaghoof het Pakistan Maandag daarvan beskuldig dat hy ‘n skietaanval op Kasjmir se de facto-grens beplan het waarin twee Indiese soldate dood is.

Hy het bygevoeg dat hy sy bevelvoerders beveel het om aggressief op te tree as daar ‘n uitlokking van die ander kant is.

“Die aanval op 8 Januarie was vooraf beplan. So ‘n aanval vereis beplanning, gedetailleerde verkenningswerk,” het genl. Bikram Singh aan ‘n nuuskonferensie in Nieu-Delhi gesê.

“Ek verwag van al my bevelvoerders om beide aggressief en offensief te wees wanneer hulle uitgelok of aangeval word,” het hy bygevoeg.

Hy het gepraat voordat bevelvoerders van beide kante van die sogenaamde lyn van beheer (LOC), wat die Himalaja-gebied skei, gesprekke sou hê om die spanning te probeer verlig. Twee soldate van beide kante is in die afgelope week dood.

Dit was die ergste voorval van geweld in Kasjmir sedert ‘n ooreengekome wapenstilstand byna ‘n dekade gelede.

– Volg Nuus24 op Twitter

 

- Reuters