Indië: Verkragtingslagoffer uit motor gered

2013-02-08 12:45

Nieu-Delhi – Die polisie het ‘n 24-jarige slagoffer van ‘n bendeverkragting uit ‘n motor in Nieu-Delhi gered en vier mans in hegtenis geneem in verband met die voorval, het beamptes Vrydag gesê.

Die motor is Donderdag in Burari onderskep ná ‘n jaagtog met die polisie. Die slagoffer is na bewering ontvoer en by ‘n woonstel verkrag, het die streek se polisiehoof, Sindhu Pillai, gesê.

“Sy ondergaan mediese toetse. Die mans is in hegtenis geneem vir verkragting en ontvoering,” het Pillai gesê.

Die vrou is van die Wes-Bengal-staat en sy ken een van die verdagtes, het Pillai gesê.

Die plaaslike media berig dat die vrou weer in die bewegende motor aangerand is nadat sy seksueel aangerand is in die woonstel, maar Pillai wou dit nie bevestig nie. Hy sê die saak word ondersoek.

Verskeie verkragtings het in Indië nuus gemaak sedert 'n 23-jarige student dood is ná sy in Desember in Nieu-Delhi op 'n bewegende bus verkrag is.

Vroeër die week het ‘n man glo probeer om ‘n ysterstaaf by ‘n jong meisie se keel af te druk toe sy haar teen haar verkragter verset het. ‘n Chinese burger is in 'n ander voorval in die hoofstad verkrag.

– Volg Nuus24 op Twitter

 

- Sapa-DPA