Indië: Verkragters wou oor slagoffer ry

2013-01-02 12:38

Nieu-Delhi – Die groep mans wat na bewering betrokke was by die verkragting van 'n 23-jarige vrou op 'n bewegende bus in Nieu-Delhi wou glo bo-oor haar ry ná hulle haar uit die bus gegooi het.

Die vrou, 'n fisioterapie-student, is in Singapoer dood, waar sy in 'n hospitaal opgeneem is vir behandeling ná sy ernstige beserings opgedoen het toe sy op 16 Desember uit die bewegende bus gegooi is.

Haar kêrel, wat ook uit die bus gegooi is ná hy aangerand is terwyl sy meisie herhaaldelik verkrag is, het daarin geslaag om haar net betyds na veiligheid te trek, het ‘n klagstaat gelui wat Donderdag by die hof ingedien sal word.

Die 23-jarige vrou het glo ook van die mans gebyt terwyl hulle haar verkrag het, het die plaaslike media berig.

Die beserings sal saam met forensiese bewyse soos bloed, semen en haarmonsters as die hoof-bewysstukke teen die verdagtes gebruik word.

Vyf van die ses verdagtes is van moord aangekla.

Die sesde verdagte is 'n minderjarige. Kinders onder 18 kan volgens Indiese wetgewing nie vir moord vervolg word nie.

– Volg Nuus24 op Twitter
 

- Sapa - AFP