Indië: Verkragters verskyn in die hof
2013-01-03 13:44
Nieu-Delhi – Die groep mans wat na bewering betrokke was by die verkragting van 'n 23-jarige vrou op 'n bewegende bus in Nieu-Delhi sal Donderdag vir die eerste keer in die hof verskyn.
Die vyf verdagtes gaan formeel aangekla word van moord, verkragting en ontvoering.
Die vrou, 'n fisioterapie-student, is in Singapoer dood, waar sy in 'n hospitaal opgeneem is vir behandeling ná sy ernstige beserings opgedoen het toe sy op 16 Desember uit die bewegende bus gegooi is.
Dit is steeds onduidelik of die sesde verdagte ook in die hof sal verskyn. Die verdagte is glo minderjarig, maar gaan ‘n beentoets ondergaan om sy ouderdom te bevestig.
Die mans word almal deur die doodstraf in die gesig gestaar as hulle skuldig bevind word, het Sushilkumar Shinde, Indië se minister van binnelandse sake, gesê.
‘n Klagstaat van sowat ‘n 1 000 bladsye sal ook Donderdag by die hof ingedien word. Die staat bevat bewysstukke soos ‘n verklaring van die slagoffer self, die getuienis van haar kêrel, wat saam met haar was toe die voorval plaasgevind het, en ander bewysstukke soos bloedtoetse en haarmonsters.
Prokureurs by die distrikshof in Nieu-Delhi het ook geweier om die verdagtes te verdedig, wat beteken dat die regering advokate moet aanstel om die verdagtes te verteenwoordig.
“Ons het besluit dat geen prokureur die beskuldigdes sal verdedig nie omdat immoreel sal wees,” het Sanjay Kumar, ‘n prokureur by die distrikshof, gesê.
– Volg Nuus24 op Twitter
- AFP
