Indië: Verkragter kry doodstraf

2013-01-16 13:30

Nieu-Delhi – 'n Nuwe spesiale hof in Indië, wat misdade teen vroue hanteer, het ‘n 56-jarige man die doodstraf opgelê nadat hy ‘n driejarige kind verkrag en vermoor het.

Regter Virender Bhat het Dinsdag die voormalige plaaswag vir die misdaad gevonnis wat in 2011 plaasgevind het.

Die man het ‘n drie-jarige dogtertjie verkrag en vermoor.

“Die hof het besluit om strenger op te tree teen dié soort misdadigers om sodoende ‘n sterk boodskap aan die publiek te stuur,” het die regter gesê.

Die spesiale howe is in die lewe geroep ná die bende-verkragting van ‘n 23-jarige student op ‘n bewegende bus in Nieu-Delhi verlede maand.

Die student is op 16 Desember verkrag, waarna die ses verdagtes haar na bewering uit die bus gegooi en oor haar probeer ry het. Die verkragting het 'n skerp reaksie in Indië en die res van die wêreld ontlok.

– Volg Nuus24 op Twitter

- Sapa-DPA