Indië: Polisie van brutaliteit beskuldig ná bendeverkragting

2013-01-10 12:45

Nieu-Delhi – ‘n Prokureur het Donderdag die Indiese polisie van brutaliteit beskuldig in die bendeverkragtingsaak wat dié land geruk het.

Die prokureur, ML Sharma, beweer die polisie het die vyf verdagtes aangerand en gedwing om te erken dat hulle die 23-jarige vrou op 16 Desember op ‘n bewegende bus verkrag het.

Vyf mans word van moord en verkragting aangekla nadat hulle glo die jong student verkrag het. Hulle het haar daarna na bewering uit die bus gegooi en oor haar probeer ry. Die verkragting het 'n skerp reaksie in Indië en die res van die wêreld ontlok.

'n Sesde beskuldigde, wat 17 jaar oud is, sal na verwagting in 'n hof vir minderjariges verhoor word.

Sharma het aan die nuusagentskap AFP gesê sy kliënte, Ram Singh, Mukesh Singh en Akshay Thakur, is tydens hul aanhouding aangerand.

“Al die beskuldigdes is erg deur die polisie aangerand en hulle is gedwing om te erken dat hulle die misdaad gepleeg het sodat dit by [die polisie se] bewyse pas,” het Sharma in Nieu-Delhi gesê.

“My kliënte is gedwing om skuld te erken vir ‘n misdaad wat hulle nie gepleeg het nie.”

Die polisie wou nie kommentaar op die bewerings lewer nie.

Sharma het Woensdag gesê dat sy kliënte almal onskuldig sal pleit.

– Volg Nuus24 op Twitter

 

- Sapa - AFP