Indië: Bendeverkraging-verhoor begin
2013-02-05 10:55
Nieu-Delhi – Die verhoor van die vyf mans wat daarvan beskuldig word dat hulle ‘n 23-jarige student in Desember op 'n bewegende bus in Nieu-Delhi verkrag en vermoor het, sal Dinsdag begin.
Vier getuies sal glo Dinsdag opgeroep word.
“Die getuies sluit in die vriend van die slagoffer wat saam met haar was tydens die aanval,” het ‘n prokureur wat nie sy identiteit bekend wou maak nie, gesê.
“Die ander getuies is die mense wat die slagoffer langs die pad gesien het en die polisie gekontak het.”
Al vyf die verdagtes het onskuldig gepleit op aanklagte wat moord, verkragting, ontvoering, die vernietiging van bewyse en sameswering insluit.
Die slagoffer is op 16 Desember met ‘n ysterpaal gemartel en op ‘n bewegende bus verkrag. Sy is saam met ‘n manlike vriend, wat ook aangeval is, vol bloed in ‘n straat gelaat. Sy is twee weke later in ‘n hospitaal in Singapoer dood.
Die mans kan die doodstraf opgelê word indien hulle skuldig bevind word.
'n Sesde beskuldigde, wat 17 jaar oud is, sal na verwagting in 'n hof vir minderjariges verhoor word. Hy kan tot ‘n maksimum van drie jaar tronkstraf gevonnis word indien hy skuldig bevind word.
– Volg Nuus24 op Twitter
- Sapa-DPA
