Indië: 52 sterf in gru-busongeluk

2012-08-11 16:04

Shimla, AFP – Minstens 52 mense is dood en 45 beseer toe 'n erg oorlaaide bus Saterdag in die noorde van Indië in 'n kloof afgestort het.

Die bus, wat meer as 100 passasiers vervoer het – baie van hulle op die dak – het die pad in 'n landelike deel van die Himachal Pradesh-staat verlaat.

"Twee-en-vyftig mense is dood en 45 is in die ongeluk beseer," het Sunil Chaudhary, adjunk-streekskommissaris, aan AFP gesê.

Die dodetal sal na verwagting styg omdat minstens 12 van die beseerdes in 'n kritieke toestand is.

Party van die lyke is reeds deur familielede uitgeken. Baie van die slagoffers het op die bus geklim ná hulle eie bus onklaar geraak het.

– Volg Nuus24 op Twitter.

- Sapa - AFP