Indië: 34 dood ná bus in ravyn afstort

2012-09-11 09:45

Nieu-Delhi – Minstens 34 mense is dood nadat 'n bus in die noorde van Indië in 'n ravyn afgestort het, het die polisie Dinsdag gesê.

Die bus het laat Maandag in die ravyn, wat in die Kangra-vallei geleë en 700 m diep is, afgestort. 

"Altesaam 34 lyke is tot dusver in die wrak van die bus gevind," het Yoginder Pal, polisiehoof, gesê.

"Vyf passasiers is in die hospitaal opgeneem. Ons gaan steeds voort met reddingsoperasies omdat daar dalk nog slagoffers kan wees," het hy gesê.

Onder die slagoffers was drie kinders en 31 mans en vroue.

Die weermag se hulp is ingeroep om met die reddingsoperasie te help.

Volgens sommige van die oorlewendes het die busbestuurders van 'n meganiese probleem tydens hul reis gepraat, het die polisie gesê.

– Volg Nuus24 op Twitter.

- Sapa-DPA