Ikea onttrek frikkadelle uit 24 lande
2013-02-26 16:32
Stockholm – Die Sweedse meubelreus Ikea het sy frikkadelle uit 24 lande onttrek weens vrese dat die gewilde kossoort perdevleis kan bevat, het hy Dinsdag gesê.
Die frikkadelle is nou uit winkels in Hongkong, Thailand en die Dominikaanse Republiek onttrek nadat dit uit verskeie Europese lande van die rak verwyder is, het Ylva Magnusson, Ikea-woordvoerder, aan AFP gesê.
“Dit is ‘n belangrike produk vir ons, so die maatreël is beduidend, maar ons wil nie hê ons kliënte moet bekommerd wees nie,” het sy gesê.
‘n Duitse laboratorium is tans besig om die frikkadelle te toets vir tekens van perdevleis, het sy gesê. Die eerste resultate sal Donderdag bekend wees.
Ikea het Maandag gesê hy het verkope van die produk in 16 Europese lande gestaak nadat beamptes van die Tsjeggiese Republiek perdevleis daarin gevind het.
Een kilogram sakke van die gevriesde frikkadelle is van die rak in Slowakye, die Tsjeggiese Republiek, Hongarye, Brittanje, Portugal, Italië, Nederland, België, Spanje, Siprus, Griekeland en Ierland verwyder, het die maatskappy gesê.
Winkels in Swede, Denemarke, Frankryk en Roemenië het die produk as ‘n voorsorgmaatreël verwyder, maar Ikea het gesê daar is geen perdevleis in die frikkadelle wat in winkels in die VSA verkoop word nie.
Ikea is die jongste groep wat by die perdevleis-skandaal betrek is wat Europa in onlangse maande getref het.
– Volg Nuus24 op Twitter
- Sapa - AFP
