‘Hy sou haar nooit probeer vermoor’
2011-10-27 09:04
Kaapstad – Sean Davison se verhaal is die hartseerstorie van ’n seun wat na sy ma in ’n moeilike tyd omgesien het, het ’n Nieu-Seelandse hof gister gehoor.
Davison se regsverteenwoordiger het gister sy saak in die hooggeregshof in Dunedin gestel, waar sy kliënt op ’n aanklag van poging tot moord op sy ma teregstaan.
Die verhoor het gister begin.
Davison het in 2009 in die boek Before We Say Goodbye beskryf hoe sy ma, Patricia Ferguson, hom gevra het om haar te help sterf. Sy was ’n afgetrede psigiater en algemene praktisyn en in 2004 is terminale, verspreide kolonkanker by haar gediagnoseer.
Nieu-Seeland het ’n juriestelsel en Davison sal sy saak voor 12 jurielede – agt vroue en vier mans – stel.
“Davison was ’n liefdevolle en toegewyde seun wat na sy ma omgesien het.
“Sy verweer is eenvoudig dat hy nooit sou probeer het om sy ma te vermoor, leed aan te doen of enigiets teen haar wil te doen nie,” het Roger Laybourne, vir Davison, volgens die Otago Daily Times aangevoer.
Twee verpleërs en ’n dokter is gister as getuies geroep om meer lig op die omstandighede kort voor die dood van Davison se ma te werp.
Volgens The Southland Times het die verpleërs getuig dat Davison dit nooit met hulle bespreek het dat hy ingegryp het om sy ma se dood vinniger te laat gebeur nie.
Die dokter het oor Ferguson se vinnige agteruitgang getuig. Volgens hom het Ferguson “tong in die kies”-opmerkings gemaak oor haar begeerte om ’n oordosis pille te drink, wat haar oorlede man vir haar gelos het, of om soos die skrywer Virginia Woolf te verdrink.
Robin Bates, staatsaanklaer, het gesê ’n kritieke paragraaf in die boek is waar Davison oor sy ma se noodlot skryf “dat dit nie in haar hande was soos wat sy beplan het nie, maar in myne”, hoe hy morfien by haar mond gehou het om te drink, hoe sy geen moeilikheid gehad het om te sluk nie, en hoe hy dan net “gewag en gehoop het” omdat hy geweet het hoe verpletterd sy ma sou wees indien sy weer sou wakker skrik.
– Volg Nuus24 op Twitter.
- Volksblad