Humanitêre krisis oorweldig Pakistan
2010-08-03 07:28
Die Burger
Peshawar (Pakistan) – Kommer het Maandag toegeneem oor die 2,5 miljoen mense wat geraak word deur die ergste vloede in dié land in 80 jaar.
Moesonreëns het tot dusver die lewens van 1 300 mense geëis.
Die swaar reëns het vloede en grondstortings veroorsaak, duisende huise weggevee en landbougrond vernietig in een van die land se mees armoedige streke.
Beamptes het gewaarsku dat die tekort aan drinkwater tot die verspreiding van siektes lei, insluitend cholera, en gesê hulle werk daaraan om mense uit gebiede soos die Swat-vallei te vlieg.
Syed Zahir Ali Shah, minister van gesondheid in die noordwestelike provinsie Khyber Pakhtunkhwa, skat dat sowat 100 000 mense – meestal kinders – siektes soos gastroënteritis onder lede het.
By ’n kamp wat deur die weermag vir nagenoeg 640 families in Nowshehra opgerig is, is voertuie wat kos en drinkwater gebring het deur vroue en kinders oorval. “Ons het pasiënte met trauma, gastroënteritis, velsiektes en dehidrasie,” het ’n dokter, Shoaib Mohammed, aan AFP gesê.
Die hoofminister van die provinsie, Amir Haider Hoti, het aan verslaggewers gesê die vloede is “ongekend” en gewaarsku dat dit tot 10 dae mag neem om die getal sterftes en vlugtelinge te bepaal.
Die sekretaris-generaal van die VN, Ban Ki-Moon, het ’n hulppakket van $10 miljoen (sowat R73,4 miljoen) vir humanitêre verligting belowe en gesê hy is “diep bedroef” deur die vloede. Amerika het hulp van $10 miljoen (sowat R72,8 miljoen) aangebied, asook helikopters en bote. China het belowe om $1,5 miljoen (R11 miljoen) by te dra.
Pakistan se weerdiens het neerslae van tot 200 mm vir die volgende weke voorspel in die noordweste, die Pakistan-beheerde Kasjmir, die sentrale provinsie Punjab en Sindh in die suide. ’n Woordvoerder vir Sindh, Mazhar Siddiqui, het gesê die provinsie is op gereedheidsgrondslag weens vrese dat tot 150 000 mense ontwortel kan word weens die vloede.
- Sapa - AFP