Hulp vir ses miljoen grootste ooit – VN
2010-08-11 06:54
Genève. – Die Verenigde Nasies sal vandag ’n beroep om internasionale hulp doen om dringende bystand aan minstens ses miljoen vloedgeteisterde mense in Pakistan te verleen.
Intussen het pres. Asif Ali Zardari van Pakistan gister te midde van skerp kritiek na die land teruggekeer uit Europa.
Die bystandsprojekte in Pakistan sal waarskynlik die grootste in die geskiedenis van die VN se wees, met ses miljoen mense wat deur ’n krisis om oorlewing in die gesig gestaar word.
“Ons fokus op mense wat direkte humanitêre bystand nodig het,” het Elisabeth Byrs, woordvoerder, Dinsdag gesê.
Sy het gesê die groter getal van 14 miljoen hulpbehoewendes mense wat regstreeks en onregstreeks deur die oorstromings geraak word, is deur die Pakistanse regering verskaf.
Dit is meer as die die som van al die onlangse groot natuurrampe – die Indiese Oseaan-tsoenami in 2004, en die aardskuddings in Pakistan in 2005 en Haïti vanjaar.
In Pakistan se reaksie op die ergste oorstromings in mense- heugenis in die land is sowel onmiddellike behuisingsnood as toekomstige verliese in die landboubedryf in ag geneem.
Elders het die Pakistanse Taliban, wat verbind word me die terreurgroep Al-Kaida, ’n beroep op die regering gedoen om nie Westerse hulp te aanvaar nie, aangesien dit die aanvaarding van “Westerse agenda” sou beteken.
John Holmes, adjunksekretaris van humanitêre aangeleenthede van die VN, sal vandag amptelik die internasionale beroep om hulp in New York doen.
Die VN se sekretaris-generaal, Ban Ki-moon, het Maandag aangedui dat die VN vir hulp van verskeie honderdmiljoen dollars (miljarde rand) sal vra.
Die omvang van die verwoesting wat deur die moesonreëns veroorsaak is stel tans eise aan hulpagentskappe wat hulle amper tot breekpunt bring, het André Mahecic, ’n woordvoerder vir die VN se hoë kommissaris vir vlugtelinge, gesê.
Afgaanse vlugtelinge is ook erg geraak, aangesien 1,4 miljoen van die 1,7 miljoen geregistreerde Afgaanse vlugtelinge in Pakistan in die gebiedeis wat die ergste getref is.
Intussen is baie gebiede slegs met donkies bereikbaar, terwyl honderdduisende mense kos en skoon water nodig het. Helikopters word ook deur slegte weer geraak en padverbindings is oral verwoes.
Volg Nuus24 op Twitter
- Sapa - AFP